Ekin Emakumeak
Ekin Emakumeak 1995. urtean sortu zen kultur elkarte bezala. Bere jatorria AEDren emakume taldean du. Beraz, euskararen normalizazioa bultzatu eta bideratzeko sortutako elkartea da.
Sorrera:
AEDko Kultura Taldearen baitan sortu zen Ekin Emakumeak. Bospasei emakumek eman zituzten lehenengo urratsak eta taldea sortzeko arrazoiak batik bat bi izan ziren:
- Etxekoandreek beraien haurrenganako hizkuntzaren transmisioan duten garrantzia kontuan hartuta, emakume hauek euskararekiko zenbat eta motibatuago egon, orduan eta gehiago hitz egingo dute euskaraz.
- Emakumeentzako hainbat ekintza euskaraz eskaintzea, euskadun izatea osotasunean bizi ahal izateko.
Hitzaldiak antolatzen ziren hasiera hartan batez ere, etxekoandreei zuzenduta.
Berehala mintza-praktika lantzen hasi ziren: 25 emakume inguru, euskaldun zaharrak eta berriak, elkartzen ziren astero eta AEK-ko ikasle eta gero irakasle izandako emakume batek bideratzen zituen saioak.
Hurrengo urratsa ikastaroak antolatzea izan zen: Euskal Herriko historiari eta Arrasatekoari buruzko bana hasieran. Horien ondoren etorri ziren gainerakoak: sukaldartiza, eskulanak, yoga, erlajazioa, psikologia, reflexoterapia, lore-zainketa, sexualitatea... beti etxekoandreentzat eta beraien ordutegira egokituta.
Gaur egun:
Hiru dira, gaur egun, elkarteak garatu dituen oinarri edota lan-ildoak:
- Arloak: kultura, ingurune soziala, osasuna, hezkuntza eta aisialdia.
- Auzoak.
- Elkartearen funtzionamendurako oinarriak: elkartearen eta baliabideen kudeaketa, antolamendu kultura eta laguntza egiturak.